इराण आणि अमेरिका यांच्यातील वाढत्या संघर्षामुळे जागतिक स्तरावर मोठी चिंता निर्माण झाली आहे. युद्ध थांबण्याची अपेक्षा असतानाच शांतता चर्चेला पुन्हा एकदा धक्का बसला. दोन्ही देशांनी युद्धविरामाचा प्रस्ताव नाकारल्याने आंतरराष्ट्रीय बाजारात कच्च्या तेलाच्या किमती झपाट्याने वाढल्या आहेत. प्रति बॅरल तेलाच्या दरात तब्बल 3 डॉलरची वाढ नोंदवली गेली असून याचा परिणाम अनेक देशांच्या अर्थव्यवस्थेवर होताना दिसत आहे.
काही महिन्यांपासून सुरू असलेल्या संघर्षामुळे मध्यपूर्वेतील परिस्थिती अधिकच तणावपूर्ण बनली आहे. अनेक देशांनी अमेरिका आणि इराण यांच्यात मध्यस्थी करण्याचा प्रयत्न केला, मात्र कोणत्याही चर्चेत ठोस तोडगा निघू शकलेला नाही. त्यामुळे युद्ध संपण्याची आशा मावळताना दिसत आहे.
गुजरातचा दमदार विजय; गुणतालिकेत मोठी उलथापालथ, RCB-पंजाबला फटका
दरम्यान, इराणने शांततेसंदर्भात काही अटींसह प्रस्ताव मांडला होता. या प्रस्तावात लेबनॉनमधील संघर्ष थांबवणे तसेच होर्मुझ सामुद्रधुनीतील जहाजांच्या सुरक्षिततेचा मुद्दा महत्त्वाचा मानला गेला. मात्र अमेरिकेने हा प्रस्ताव स्वीकारण्यास नकार दिला. त्यानंतर दोन्ही देशांतील तणाव आणखी वाढला आहे.
युद्धामुळे जागतिक ऊर्जा पुरवठ्यावर गंभीर परिणाम होत आहेत. विशेषतः होर्मुझ खाडीतील परिस्थितीमुळे कच्चे तेल आणि एलपीजी गॅसच्या पुरवठ्याबाबत चिंता वाढली आहे. तेलाच्या वाढत्या किमतीमुळे अनेक देशांमध्ये महागाईचा दबाव निर्माण होण्याची शक्यता वर्तवली जात आहे.
जगभरातील अनेक राष्ट्रे युद्ध थांबवण्यासाठी प्रयत्न करत असली तरी अद्याप कोणतीही सकारात्मक घडामोड समोर आलेली नाही. उलट, प्रत्येक अपयशी चर्चेनंतर परिस्थिती आणखी चिघळताना दिसत आहे. त्यामुळे जागतिक बाजारपेठ, ऊर्जा क्षेत्र आणि आंतरराष्ट्रीय राजकारणावर या संघर्षाचे गंभीर परिणाम होत आहेत.
