सरळसेवेची ही पदे 'मानधन' तत्त्वावर भरण्यात येणार; सुटीच्या दिवशी राज्य सरकारचा जीआर

Saralseva New Gr : सरकारी सुट्टी असतानाही राज्य सरकारने जीआर काढून आदिवासी भागातील सरळ सेवेची पदे मानधन तत्त्वावर भरण्याचा निर्णय घेतला आहे.

आदिवासी आमदारांनी मंत्रालयात उडी घेतल्यानंतर शनिवारी शासकीय सुट्टी असतानाही राज्य सरकारने जीआर काढून आदिवासी भागातील सरळ सेवेतील पदे मानधन तत्त्वावर भरण्याचा निर्णय घेतला आहे.

अनुसूचित क्षेत्रामध्ये (PESA) गावपातळीवर कार्यरत असलेल्या 17 संवर्गातील पदांसाठी भरतीसाठी जाहिरातीद्वारे निवड प्रक्रिया अंतिम टप्प्यात पोहोचली होती. ही प्रक्रिया ६,९३१ रिक्त पदांसाठी भरतीसाठी होती. त्यामुळे पात्र उमेदवारांमधून मानधन तत्वावर नियुक्त्या करून या रिक्त जागा त्वरित भरल्या जातील.

रिक्त पदांमुळे पेसा क्षेत्रातील गावांमध्ये आरोग्य, शिक्षण आदींसह प्राथमिक सुविधा व ग्रामविकासावर विपरीत परिणाम झाला आहे, त्याचप्रमाणे केंद्र व राज्य शासनाच्या योजनांची प्रभावीपणे अंमलबजावणी करण्यात अडचणी निर्माण झाल्या आहेत.

या जिल्ह्यांमध्ये भरती

राज्यातील 36 जिल्ह्यांपैकी 13 जिल्हे पेसा क्षेत्रात येतात. यामध्ये ठाणे, पालघर, नाशिक, धुळे, नंदुरबार, जळगाव, अहमदनगर, पुणे, नांदेड, अमरावती, यवतमाळ, गडचिरोली, चंद्रपूर या जिल्ह्यांचा समावेश आहे. तेथे केवळ 17 संवर्गातील आदिवासी उमेदवारांची नियुक्ती प्रक्रिया थांबविण्यात आली.

जीआरमध्ये काय आहे?

पेसा क्षेत्रातील पदे तातडीने भरण्यासाठी हा निर्णय घेण्यात आल्याचे आदिवासी विकास विभागाच्या जीआरमध्ये म्हटले आहे. हा निर्णय एकदाच घेण्यात आला आहे. भविष्यात पुन्हा असा निर्णय घेता येणार नसल्याचे विभागाने स्पष्ट केले आहे. पहिल्या नियुक्तीच्या वेळी मिळालेल्या एकत्रित पगाराच्या समान वेतनावर नियुक्ती केली जाईल.