Ladaki Bahin Yojana Update : राज्य सरकारने मुख्यमंत्री लाडकी बहीण योजना जाहीर केली. या योजनेसाठी अर्ज भरण्यासाठी गावोगावी आणि शहरातून मोठी गर्दी झाल्याचे दिसून आले. तसेच रक्षाबंधनाच्या दिवशी जुलै व ऑगस्ट महिन्याची रक्कम या योजनेच्या लाभार्थ्यांच्या खात्यावर एकत्रित जमा करण्यात येणार आहे. त्यासाठी तांत्रिक पडताळणी सुरू झाली आहे. तसेच काही निवडक अर्जदारांच्या बँक खात्यात प्रत्येकी एक रुपया जमा करण्यास प्रायोगिक तत्त्वावर सुरुवात करण्यात आली आहे. हा केवळ तांत्रिक प्रक्रियेचा एक भाग असून, याबाबत गैरसमज करून घेऊ नये, असे आवाहन महिला व बालविकास मंत्री आदिती तटकरे यांनी केले आहे.
महिला आणि बालविकास मंत्री अदिती तटकरे यांच्या ट्विटर हँडलवरून एक व्हिडिओ ट्विट करण्यात आला आहे. या ट्विटमध्ये बोलताना त्या म्हणाल्या की, मुख्यमंत्री माझी लाडकी बहीण योजनेअंतर्गत अनेक अर्ज येत आहेत. पात्र अर्जदारांच्या खात्यात रक्कम जमा होईपर्यंत संपूर्ण प्रक्रियेची तांत्रिक पडताळणी करणे आम्हाला बंधनकारक आहे. यासाठी आम्ही प्रायोगिक तत्त्वावर काही निवडक अर्जदारांच्या बँक खात्यात प्रत्येकी एक रुपया जमा करत आहोत. गोळा केलेला एक रुपया हा लाभार्थ्यांसाठी कोणतेही मानधन नाही तर तो आमच्या तांत्रिक पडताळणी प्रक्रियेचा एक आवश्यक भाग आहे. एकदा ही पडताळणी सुरू झाल्यावर, पुढील प्रक्रिया अधिक सुरळीत होण्यास नक्कीच मदत होईल. अर्जदार पालक आणि भावंडांना आमची विनंती आहे की हा आमच्या तांत्रिक प्रक्रियेचा एक भाग आहे आणि या संदर्भात कोणत्याही प्रकारच्या गैरसमज किंवा कोणत्याही प्रकारच्या अपप्रचाराला बळी पडू नका.
आधी खात्यात 1 रुपया जमा होईल
मुख्यमंत्री माझी लाडकी बहीण योजनेअंतर्गत महिला आणि बालविकास विभागाकडे 1 कोटीहून अधिक अर्ज आले आहेत. पात्र अर्जदारांच्या खात्यात पैसे जमा होईपर्यंत संपूर्ण प्रक्रियेची तांत्रिकदृष्ट्या पडताळणी करण्यासाठी, आम्ही प्रायोगिक तत्त्वावर काही निवडक महिला अर्जदारांच्या बँक खात्यात 1 रुपये जमा करू. हे 1 रुपये मानधन नसून तांत्रिक पडताळणीचा भाग असेल. त्यामुळे या संदर्भात भगिनींनी कोणत्याही प्रकारच्या अपप्रचाराला व गैरसमजाला बळी पडू नये, असे आवाहन करण्यात आले.
